رواية من ادب الجحلط "" حب على ضفاف الدائري""

[speed]

بسم الله الرحمن الرحيم

كالعادة الموضوع طويل ولا تدققون وبصراحة موضوعي ماله فايدة

يعني لو تطلع اصرف لك :D


البداية


هذا أنا هايم في أحد الشوارع ،،، وين رايح ؟؟ رايح للبقاله اشتري بفك وميرندا قبل يبتدي سندباد وبصراحه اللي ما جرب سندباد وبفك وميرندا لا يتعبر نفسه أكل اكله حلوه مع الأخذ بعين الاعتبار ان سندباد ما يوكل
الساعه الحين ثمان الا عشر وسندباب يجي في الاي ار تي قناة البزران الساعه ثمان يعني معي 10 دقايق وبكون فيها فاضي (( اتعب يا بيل قيتس انت ووقتك المهم )) ،، وانا راجع لبيتنا حصلت سياره واقفه عند بيت الجيران وانا اللي اعرفه ان الجيران طلعوا يعني بيتهم فاضي اجل من هذا ؟؟؟ ويوم اني قربت الا هي سيارة نقل عفش ومكتوب عليها (( شركة شد لي واقطع لك لنقل العفش والاثاث مع ملاحظة اننا ما نشتغل الا السبت بس ،،، لصاحبها الطيب عصمان ويوم اني قريت اسمه صاحبها عرفت ليه الشركه ما تشتغل الا السبت

واستنبطت من هالشي ان فيه جيران جدد بيسكنون في البيت (( ذكي ما شاء الله علي )) وفعلاً شفت ولدهم وشكله غبي بس موب مشكله اهم شي الاخلاق واهم شي نضمنه حارس لفريق الحاره لأن حارسنا الاول دحيم سكنوا من الحاره وانا مطلع اشاعه عند فرق الحواري الثانيه انه اصيب اصابه مزمنه عشان ما يعيرونا ويقولون فريقكم مثل ريال مدريد ماعنده احتياط
فكرت لبرهه وقلت لنفسي ان شاء الله ما يكون عندهم بنات درء للفتنه ،،، وهالخبر ان شاء الله بكره يجيني اذا امي سيّرت عليهم .
طالعت بساعتي لقيت باقي ثلاث دقائق ونصف على سندباد يعني فرصه نتجذاب اطراف الحديث انا وولدهم السبهه
رحت له وسلمت عليه وعرفني بنفسه اسمه حمد(( عرفت ليه انا مسميه حمد يا فلان ؟؟؟



وكان كما توقعت سبيكه مدري وش يبي ،،، حتى انه يوم سألني وين جاي من قلت من البقاله وشاري بفك وميرندا وسندباد (( من صار السبهه )) عرض علي انه يخاويني يشوف سندباد وخصوصاً ان ماعندهم دش وابوه مهوب مركب اصلاً يعني كل يوم بيشوف سندباد عندي
وافقت وش اسوي اهم شي اكسب صفقته قبل يوقع معه بيرلسكوني
تفرجنا على سندباد وكانت حلقه رهيبه يوم ان ياسمينه ترجع بنت مره ثانيه ،، بس قهر باقي ابوها وامها الى الحين وهم عصافير
خلصت الحلقه وراح صديقي حمد لبيتهم وجلست انا ببيتنا وشغلت سندباد مسجله بالفيديو وجلست اتفرج على ياسمينه يوم انها صارت بنت مدري ليه احس انها صارت حلوه
راح على السالفه كم يوم .....



وفي أحد الأيام <<<< تأثير سندباد ،،، كان عندنا مباراة ضد الحاره المجاوره يعني كان ديربي ،، والفريق ناقص حارس وبالتالي رحت لحمد وعرضت عليه اني اوقع معه العقد ،، طقيت الباب وفتح لي حمد وقلت له / بسرعه لا تضيع الوقت البس ملابسك وتعال ورانا مباراة ،، قال لي / ماذا تقصد يا هذا ؟؟ اي نوع من المباريات تلك اللتي تتحدث عنها ؟؟ قلت له / اقول انطم وكمّل لا نصيف على الشباب ،، رد علي / إن الحرب على الأبواب ،، وبالتالي يجب ان نستعد لها جيداً ؟؟ فجهز درعك (( وميداليتك الذهبيه )) وسيفك استعداداً للحرب ،، ولا تنسى السيف فالأعزل لا مكان له بيننا .
طالعته وقلت /
وحمدت ربي ورحت اجمع باقي الفريق واخذت رشيد راعي المغسله الهندي ومسكته حارس بعد ما وقعت معه عقد انه محترف
انتهت المباراة بمدري كم ،، ورجعت لبيتنا مثل العاده بعد كل مباراة انواع الاصابات كني رونالدو ،،، وتوي داخل الحاره الا واحصل حمد السبهه قلت فرصه اتهكم فيه شوي ،، ورحت له وسألته / هاه وش صار على الحرب ؟؟ جاوبني وقال / مازال الحكم مبكراً ،،، واعتقد انها ستكون حرب ضروس !!!
الظاهر قصده انهم يعضون بعض بضروسهم ما يحاربون بالسيوف


بعد هالقصه بكم يوم قابلت حمد مره ثانيه وجيت بسأله ليه ماجاني يشوف سندباد من كم يوم ؟؟ لا يكون زعلان !!
رد علي وقال / إنني أحاول ان ادير المعركه بشكل افضل ،، لذلك تراني منعزل عن العالم وجالس في خندقي اوجه الجنود فقط .
قلت بنفسي : مسيكين شكل حالته صعبه وانا على بالي انه يمزح ،، الله يشفيه ،، وشغلت سيارتي ورحت ،،، وفي نفس اليوم قابلت ابوه بعد صلاة العشا وحنا طالعين من المسجد وسألته وش فيه حمد ماسكه معه على حروب وعلى فصحى ؟؟
قال ابوه / حمد حالته غريبه ،، فهو يعيش حاله ما يعيشها غيره والسبب انه يتأثر بأي شي يقراه تأثر غريب لدرجة انه يعايش الوضع نفسه او يتخيل انه يعايش الوضع نفسه ،، وماباقي دكتور نفساني ما ودينه له حتى اني حفظت شوارع عليشه ،، ولكن مافيه فايده ،،، والمشكله اني انا وامه صرنا نرفع عنه كل الكتب والمجلات حتى مجلة ميكي بس للأسف وحنا نشيل العفش حصل كتاب صدفه وكان اسم الكتاب (( أحداث سقوط الدوله الأمويه )) ومن عقبها وهو مثل ما تشوف
قلت له / طيب كم يقعد كذا ؟
قال ابوه / بالعاده شهر والحين له حول عشره ايام يعني الله يعين باقي 20 يوم
سحبت نفسي ورحت لبيتنا وانا افكر في حالة هالولد مسيكين ،،، الرجال ناوي يغزو ويقيم دوله جديده وانا ابيه حارس للفريق هههههههههههههههههههههههههههههه

طلعت اليوم الثاني العصر كان عندي مشوار ،، وتوي مشغل السياره الا ويفتح حمد الباب ويركب ،، قال لي / اتأخذني معك يا أخ العرب على راحلتك فأنا تائه في هذه البيداء ولا أعرف ما افعل ؟؟
اجل speed صار العرب ههههههههههههههههههههههه ،، قلت له / اركب انت والبيداء حقتك وفرصه افرج اخوياي على شي جديد
وتوي ماسك الدائري الا ويلتفت حمد المنسم ويشوف بنت قمر في سياره كابرس موديلها 2003 فضي LS (( مسوي دقه هههههههههههههههههههههه )) وكان يسوق بها سواق الظاهر انه اخو رشيد راعي المغسله يشبه له
التفت علي حمد وقال لي : اسمع يا هذا ،، حاول ايقاف هذا الهودج لنأخذ هذه السبيّه فهي رائعة الجمال .
قلت له / اقول انقلع انت والهودج ،، الظاهر انك منتب صاحي ،، حارشها بس عشان ياخذونا الهيئه انا وانت سبايا
قال / ولكن قلبي تعلق بها ؟؟؟ اريد اخذها ثم الزواج منها فيما بعد .
قلت له / لا يكثر وكانه على السبايا الرياض مليان طب وتخير
من زينه يقول لي يا هذا ويبيني اوقف

رحت به للعيال وجلسوا يضحكون عليه مسيكين ،،، وهو يقول لو لم اكن اعزل لقطعت رقابكم ،،، من جد الولد مهوي
رجعته لبيتهم ورحت لبيتنا وجلست عند الفيديو وشغلت سندباد يوم ان ياسمينه تصير بنت وجلست اتفرج
بعد كم يوم كنت صاحي الصبح بروح للدوام ،،، وتوي طالع الا والقى حمد هالولد مدري متى ينام ،، قلت له / هاه يا حمد وش اخبار الحرب ؟؟ يا حبي للتريقه هههههههههههههههههه
رد علي وقال / ماذا ظننت ؟؟ اتحسب انها تنتهي بين يوم وليله ؟؟ إن داحس والغبراء استمرت حربهم اربعين سنة ونيف وربما تستمر حربنا هذه مثلها او تزيد ...
قلت له / خير ان شاء الله يا تزيد ،، والحين تبي شي ؟؟
قال / أريد منك أن تأخذني معك ،، فقد اجد تلك الفتاة اللي في الهودج ال LS وآخذها سبيه ،، فقد سحرت لبي
قلت / هودج LS اجل اركب بارك الله فيك (( ناوي اوريه اخوياي في الدوام ))
وحنا في الطريق كان طريق الملك فهد زحمه مثل العاده وكان حمد يتلفت يمين ويسار ويقول / ما كل تلك الهوادج والأحصنه ؟؟ اعتقد انهم يملكون جيشاً عرمرم !!!
وانا اقلب في هالراس وش عرمرم وش هودج ؟؟
هذي تالية اللي ما يتابع شرح مدرس اللغه العربيه
وصلنا للدوام وسوا مع اخوياي نفس الحركه وهددهم لو انه مهوب اعزل كان لعن خيرهم ،، ويوم طلعنا من الدوام قلت له اني بعزمه على الغدا ،،، قال / حسناً إذاً اليك الطريقه ،،، قف عند بائع اللحم واشتر لنا لحماً بدانق ودعنا نتغدى .
اما بدانق اثرها فلوس اول احسبها نوع كفرات هههههههههههههههههههههههه
وقفت وشريت له لحم مشوي بخمس دوانق خله يشبع


واستمر الحال فتره طويله ....
يوم يبي لحم بدانق
ويوم يريد ان يصطاد من البحيره (( مايدري ان مافي الرياض الا المجاري :D )
ويوم يريد ان يشتري برده لأنه سيقابل الوالي
ويوم يبي سبية الدائري اشغلني هو وياها
وبصراحه من جد سيطرت على عقله راعية الدائري ولو انه رخيصه شريت له ثنتين
ويوم انه كمل الشهر ورجعت حالته طبيعيه فرحت من قلبي وحمدت ربي اني بتخلص منه ومن بلاويه
وفي أحد الأيام الخوالي ولما ارخى الليل سدوله (( لعب بمخي حمد)) كنت توي جاي من دشرتي آخر الليل واحصل ابوحمد عند باب بيتهم جالس ضايق صدره ،، سألته / وش فيك ياابوحمد عسى مافيكم شي ؟
قال / ابد مافينا الا العافيه بس حمد
قلت / حمد طاب وش فيه بعد ؟؟
قال لي انه حصل كتاب منطول عند بيت الجيران وقراه ومن عقبها وهو بالبلا ،، والمشكله توه قاريه من ساعتين يعني باقي عليه ويطيب شهر كامل
ويوم اني سألت ابوحمد وش الكتاب وعلمني اتصلت على دوامي وأخذت اجازه شهر لا اتورط به ثانيه وقررت اني مااطلع من بيتنا طول هالشهر ولا اطلع من غرفتي مره وحده لا اتورط به ،، تدرون وش الكتاب اللي قراه ؟؟7
7

7
7
7
7
7
7
7
7
7

طريقة العناية بمن على وشك الولاده :o


تحياتي speed
 المصدر : http://forum.merkaz.net/

 

 

 

 

 

[روبي]

أخــــــــــــي speed

ههههههههههههههههههههههههههههههههههههههههههاااااااا ااااي


حلووووووه قصتك ورااايقه

يسلموووااااا والله خطيره


ضحكت من قلبي

آه احسه تقطع



الله يرجك

يعطيك العافيه اخوي وننتظر قصه ثانيه بعد <===== عجبهـــا الوضـــــــع ههههههه


أختك روبــــــــــــــــي
 المصدر : http://forum.merkaz.net/



 

 

 

 

 

[الفارس]

هههههههههههههههه

هلااا والله بسبيد

الحمد لله على السلامة

منور المنتدى اخوي انت وحمد رفيقك

اقول جيبه عندنا الله لا يهينك خلينا نمزح معه

هههههههههههههههه

بإنتظار وحده ثانيه من سواليفك

وتحياتي لك
 المصدر : http://forum.merkaz.net/



 

 

 

 

 

[المطبخ]

ههههههههههههههههههههههههههههههههههاااااااااااااااا ااااااااااااااااااااااي





يووووووووووووووووووووووووه تقطعت من الضحك



من جد هالولد حالته صعبه

بس وناااااااااااااااااااااااااااااسه


يسلمو سبيد


ولاحرمنا جديدك يا الغالي



تحياتي
 المصدر : http://forum.merkaz.net/



 

 

 

 

 

[speed]

يعطيكم العافية حبايب قلبي ولاهنتوا على الردود


روبي بإذن الله القادم احلا عزيزتي


الفارس .. اخاف اجيبة ويكون معه السيف ويلعب فينا خله يركد هناك كاف خيرة وشرة
ويعطيك العافية حبيبي على المرور



برنثيثة <<< مسكت على اثرم
تتقطعين بالعافية يارب ومن جد حالتة صعبة هالحمد ادعو له بس ههههههههههه

وانتظروا القادم بإذن الله




تحياتي
 المصدر : http://forum.merkaz.net/